Kunngerð um at seta í gildi § 4 í lóg um talgildan samleika
Fíggjarmálaráðið sendir við hesum uppskot til kunngerð um at seta í gildi § 4 í lóg um talgildan samleika til hoyringar.
Lógin um talgildan samleika varð samtykt í mai 2019.
Í § 15, stk. 2 løgtingslógini er ásett, at landsstýrismaðurin í kunngerð ásetir nær § 4 í løgtingslógini skal setast í gildi. Tá ið lógaruppskotið varð lagt fram, var talgildi samleikin ikki liðugt mentur, og tí var ikki møguligt at áseta nær § 4 skuldi setast í gildi. Harumframt var endamálið eisini at geva almennum stovnum, almennum partafeløgum og peningastovnunum eitt skotbrá áðrenn kravt verður, at hesi skulu nýta talgilda samleikan til sínar talgildu tænastur.
Við hesi kunngerð verður § 4 løgtigslógini um talgildan samleika sett í gildi tann 1. september 2022.
Í § 4 er ásett, at allir almennir stovnar og almenn partafeløg umframt peningastovnar skulu loyva persónum at nýta talgilda samleikan, um stovnurin veitir tænastu, ið krevur elektroniska eyðmerking av persónum ella elektroniska undirskrift.
Endamálið er, at almennu Føroyar og peningakervið í Føroyum fáa eina felags loysn fyri alt samfelagið, so borgarin bara skal nýta ein hátt at eyðmerkja seg mótvegis talgildum tænastum. Fyri samfelagið er tað somuleiðis ein fyrimunur, tí við hesum er ikki neyðugt at menna fleiri ymiskar KT-loysnir til tær einstøku tænasturnar, har elektronisk eyðmerking og undirskrift krevst.
Kunngerð Um At Seta Í Gildi § 4 Í Løgtingslóg Um Talgilda Samleika 