Frá 1. januar skulu allar kommunur í landinum fylgja felags reglum fyri, hvussu inntøkur og útreiðslur skulu gerast upp.
Í nýggjari kunngerð verður nágreiniliga sagt, hvussu kommunurnar frá 1. januar næsta ár skulu skipa sínar roknskapir. Eisini fíggjaræltanin fyri 2009 skal gerast eftir felags reglunum.
Eisini verða nú felags reglur fyri, hvussu kommunurnar skulu gjalda rokningar og eftir hvørjum roknskaparleisti ogn og skuld skal uppgerast.
- Hetta fer at geva bæði kommunum og landinum eitt neyvt og álítandi yvirlit yvir fíggjarstøðuna hjá kommunum, sigur Jóannes Eidesgaard, landsstýrismaður í fíggjarmálum.
Allar kommunur skulu seta roknskapin upp eftir somu reglum og kravt verður eisini, at roknskapirnir skulu vera teldutøkir. Hvønn mánað skulu tølini sendast til Fíggjarmálaráðið, sum kann síggja fíggjarstøðuna hjá einstøku kommununi ella gera eitt yvirlit yvir samlaðu støðuna í landinum.
- Vit fáa eitt fyrsta floks amboð at fylgja við fíggjarviðurskiftunum hjá kommununum. Kommunurnar eru ein so stórur partur av samlaða búskapinum í landinum, at tað er neyðugt at hava neyva vitan um, hvussu gongdin í kommununum er, sigur Jóannes Eidesgaard, landsstýrismaður í fíggjarmálum.
- Hetta er eitt neyðugt amboð, sum vit hava bíðað eftir og sum vónandi eisini verður eitt gott amboð hjá kommunum sjálvum, sigur landsstýrismaðurin.
Argir 17. oktober 20008
Fíggjarmálaráðið
Politiskar viðmerkingar fáa frá Jóannes Eidesgaard, landsstýrismanni, á tel. 35 20 20
Kunngerð nr 89 frá 15. oktober 2088 um roknskaparverk kommunanna o.tíl.